Kenya
Kenya: Umwuzure wahitanye 23, ingendo z’indege zikomwa mu nkokora
Umwuzure wibasiye Umujyi wa Nairobi muri Kenya wahitanye abantu 23, ndetse ingendo z’indege ku bibuga bimwe na bimwe zirahagarikwa.
Uyu mwuzure wanatwaye imodoka zirenga 10. Reuters yanditse ko umugezi wa Nairobi wuzuye ugatwara abantu bamwe.
Perezida wa Kenya, William Ruto yatangaje ko yohereje itsinda ry’abakora ubutabazi bw’ibanze harimo n’abasirikare ngo bayobore ibikorwa by’ubutabazi. Yanihanganishije abo mu miryango yagize ibyago.
Ushinzwe umutekano wabonye umuvu utwara abantu i Nairobi, mu ijoro rishyira ku wa 7 Werurwe 2026, yabwiye Reuters ko yabonye amazi atwara umuntu babura aho agiye ariko mu gitondo bamubona munsi y’imodoka.
Polisi ya Kenya yatangaje ko abantu 23 bapfuye.
Abahanga mu bijyanye n’ibidukikije bavuze ko imihindagurikire y’ikirere yatumye agace k’u Burasirazuba bwa Afurika kahuye n’imyuzure kubera imvura igwa ari nyinshi mu gihe gito, ibindi bihe bikabamo amapfa.
Kenya Airways yatangaje ko iyi mvura yatumye ingendo zimwe zisubikwa abandi bajya gufatira indege i Mombasa.
