MU MAHANGA
Iran ivuga ko nta biganiro bishoboka mu gihe abo bahanganye bakiyirasaho
Ku wa Mbere, Esmaeil Baghaei, umuvugizi wa Minisiteri y’Ububanyi n’Amahanga ya Iran, yatangaje ko nta biganiro bishoboka mu gihe igihugu kigikorerwaho ibitero bya gisirikare.
Yagize ati: “Mu gihe ibikorwa by’igisirikare bikomeje, ntaho twaganira uretse gusubiza mu buryo bukomeye.”
Minisitiri Abbas Araghchi yavuze ko mu kwezi kwa Kamena gushize Tehran yemeye guhagarika imirwano nyuma y’iminsi 12 y’intambara, ariko ubu ngo hakenewe iherezo ry’igihe kirekire ku ntambara.
Perezida Donald Trump yabajijwe niba imipaka ya Iran izasigara ari imwe nyuma y’iyi ntambara, asubiza ati: “Ibyo sinabibabwira. Birashoboka ko bidakomeza.” Baghaei yamushinje gufata isi nk’aho ari “ubutaka bwo kugurisha,” avuga ko ku baturage ba Irani, “ikarita y’igihugu ari ikimenyetso cy’ubwigenge n’ishema, kandi bazayirwanira kugeza ku rupfu.”
Baghaei yavuze ko Iran itigeze irasa misile ku baturanyi bayo nka Turukiya cyangwa Azerbaijan. Yongeyeho ko kurinda igihugu bidakwiye gusobanurwa nk’ubushotoranyi ku baturanyi.
Ingabo za Amerika ziherutse kurasa misile bikekwa ko yaturutse muri Iran, yari igiye kwinjira mu kirere cya Turukiya.
Perezida Masoud Pezeshkian wa Iran yabwiye mugenzi we wa Azerbaijan ko nta gikorwa kitemewe cyakozwe ku gihugu cye. Ariko Azerbaijan yatangaje ko yahagaritse ibikorwa by’ubushotoranyi byateguwe n’Ingabo za Revolutionary Guard Corps (IRGC), birimo umugambi wo gutera umuyoboro ukomeye w’amavuta.
RIB yahakanye amakuru ko yahagamaje G Tuff kubera ‘indirimbo ye y’ibishegu
RIB yatanze gasopo ya nyuma ku banyamakuru ba siporo bandagazanya
