AMAKURU YO HIRYA NO HINO

Perezida wa Sena y’u Burundi yasuye u Rwanda mu rwego rwo gushimangira umubano hagati y’ibihugu byombi

Perezida wa Sena y’u Rwanda, Dr. Kalinda François Xavier, yakiriye mugenzi we w’u Burundi, Sinzohagera Emmanuel, i Kigali ku wa 20 Kamena 2025, mu ruzinduko rwibanze ku gushimangira umubano hagati y’inteko zishinga amategeko z’ibihugu byombi.

Nubwo umubano w’u Rwanda n’u Burundi wigeze kuzamba cyane guhera mu mpera za 2023, ibi biganiro byari bigamije kongera icyizere no gukomeza umubano mu ruhando rwa dipolomasi.

Sena y’u Burundi yatangaje ko ibiganiro byari bigamije gushakira hamwe inzira yo kongera kubaka icyizere no kuzamura ubufatanye. Sinzohagera yashyikirije Dr Kalinda impano y’agaseke kari mu  mabara y’ibendera ry’u Burundi, nk’ikimenyetso cy’ubusabane.

U Rwanda rwavuze ko nubwo hari ibibazo by’ingutu byadindije intambwe y’ubwiyunge, ruzakomeza gukorera mu nzira y’amahoro n’ubufatanye.

OMS izatangariza i Kigali amabwiriza mashya ku muti wo gukumira SIDA utangwa rimwe mu mezi atandatu

Ishami ry’Umuryango w’Abibumbye ryita ku Buzima (OMS/WHO) ritangaza ko rizashyira hanze amabwiriza agenga ikoreshwa rya Lenacapavir, umuti mushya uzajya uhabwa umuntu rimwe mu mezi atandatu mu rwego rwo gukumira ikwirakwira rya virusi itera SIDA (VIH).

Ibyo bizabera mu nama mpuzamahanga izabera i Kigali ku wa 14 Nyakanga 2025. Iyi ntambwe ije nyuma y’uko Ikigo cya Amerika gishinzwe imiti na FDA cyemeje ikoreshwa ry’uwo muti uterwa nk’urushinge rimwe, ukoreshwa mu kurinda ubwandu bushya.

Lenacapavir wakozwe na Gilead Sciences, uzaba udasaba kunywa ibinini buri munsi nk’uko byari bisanzwe. OMS yatangaje ko iri gukorana n’ibigo by’imiti ku isi nk’icya EU (EMA), kugira ngo byorohereze ibihugu kuwushyira mu bikorwa. Minisitiri w’Ubuzima mu Rwanda, Dr. Sabin Nsanzimana, yavuze ko ubushakashatsi bwerekanye uburinzi buhambaye kuri uyu muti, ariko hakiri ibikenewe kwigwaho birimo igiciro n’imikoranire y’inzego z’ubuzima.