U Rwanda rwakiriye abarwanyi 15 bavuye muri FDLR

U Rwanda rwakiriye abarwanyi 15 bavuye mu mutwe w’iterabwoba wa FDLR n’abaturage b’abasivili bafitanye isano n’imitwe yitwaje intwaro barindwi.

Aba Banyarwanda bacyuwe n’abakozi bari mu butumwa bw’amahoro bw’Umuryango w’Abibumbye muri Repubulika Iharanira Demokarasi ya Congo (MONUSCO), babashyikiriza u Rwanda kuri uyu wa 25 Ugushyingo 2025.

Perezida wa Komisiyo y’Igihugu ishinzwe gusezerera no gusubiza mu buzima busanzwe abahoze ari abasirikare (RDRC), Nyirahabineza Valerie yahamirije IGIHE yemereye IGIHE ko mu bo bakiriye harimo abana batanu.

Advertisement

Ati “Uyu munsi twakiriye abaturage baturutse mu mashyamba 22, harimo abari abasirikare 15 n’abaturage b’abasivili bafitanye isano n’imitwe yitwaje intwaro barindwi.”

Akomeza avuga ko iyo aba bahoze ari abarwanyi batashye, bahita bajyanwa i Mutobo kugira ngo bahabwe amahugurwa abategurira gususubizwa mu buzima busanzwe.

Ati “Iyo bizanye ku bushake bwabo (voluntary repatriation) bahabwa amahugurwa mu gihe cy’amezi atatu cyangwa ane mbere yo gusezererwa no gusubizwa mu buzima busanzwe. Tubasezerera bagasubira mu miryango bakomokamo nyuma yo kubakorera isuzuma (assessment) dufatanyije n’inzego nyinshi zidufasha kubahugura rikagaragaza ko imyitwarire yabo yahindutse.”

Advertisement

Nyirahabineza avuga ko amahugurwa baha abahoze ari abarwanyi aba agamije kubakuramo ingengabitekerezo mbi yabokamye ya Jenoside bigishwa mu mashyamba ya Repubulika iharanira Demukarasi ya Congo.

Aba barwanyi iyo batashye kandi bahabwa ubuvuzi butandukanye burimo n’ububafasha gukira ihungabana, kuko abenshi bataha bafite ibyo bibazo.

Ati “Uretse amahugurwa, bahabwa ubufasha bwinshi burimo ubuvuzi, gucumbikirwa, kugaburirwa, guhabwa imyenda n’ibindi bikoresho by’ibanze, kandi abagore, abana, abasaza ndetse n’abamugaye bahabwa ubufasha bujyanye n’ibyo bakeneye by’ibanze.”

Advertisement

Yanaboneyeho gusaba abamaze kugera mu miryango yabo, gukangurira bagenzi babo bakiri mu mashyamba kurambika intwaro bagataha mu gihugu cyababyaye kuko cyiteguye kubakira.

Kuva muri Mutarama kugeza mu Ukwakira 2025, MONUSCO yacyuye abarwanyi 54 b’Abanyarwanda babaga muri RDC, biganjemo aba FDLR. Batahanye n’abo mu miryango yabo 44.

Imibare itangwa na Komisiyo y’igihugu ishinzwe gusezerera no gusubiza mu buzima busanzwe abahoze ari abasirikare (RDRC) igaragaza ko kuva mu 2001 imaze gusubiza mu buzima busanzwe abantu 12.602 bahoze mu mitwe y’inyeshyamba ikorera mu burasirazuba bwa Repubulika Iharanira Demokarasi ya Congo, bose baje mu byiciro 75 bimaze kuhanyuzwa.

Advertisement