Intambara ya Iran na Israel: Ibigezweho kugeza ubu (22 Kamena 2025)

Leta zunze Ubumwe z’ Amerika zinjiye mu ntambara

Ku wa 22 Kamena 2025, Leta Zunze Ubumwe za Amerika zagabye ibitero by’indege ku bikorwa bya kirimbuzi bya Iran biri i Fordo, Isfahan, na Natanz.

Ibi bitero byakozwe n’indege zidasanzwe za B‑2 Stealth Bombers, byari bigamije gusenya ibikorwaremezo bya Iran byifashishwa mu gukora intwaro za kirimbuzi.

Amerika yatangaje ko intego atari uguhindura ubutegetsi muri Iran, ahubwo ari ukurinda ko icyo gihugu gikomeza gukora intwaro za kirimbuzi.

Mu gusubiza Iran nayo yagabye ibitero by’amasasu y’intambara (ballistic missiles) n’indege z’intambara zigenzurwa na mudasobwa (drones) kuri Israel.

Ibyo bitero byibasiye imijyi nka Tel Aviv, Haifa na Be’er Sheva, ndetse n’ikibuga cy’indege cya Ben Gurion.

Iran yatangaje ko ibitero bya Amerika ari “ubugizi bwa nabi bw’amahanga,” kandi ko Israel iri gukoresha Amerika mu nyungu zayo.

IAEA (Ishami ry’Umuryango w’Abibumbye rishinzwe gukurikirana ikoreshwa ry’ingufu za kirimbuzi) ryatangaje ko nta mwuka w’ubumara (radiation) wigeze usohoka nyuma y’ibyo bitero.

Amakuru aturuka mu nama yabereye i Vienna avuga ko ibiganiro by’amahoro hagati ya Iran n’ibindi bihugu bihagaritswe kubera uko ibintu bihagaze.

IMPAKA ZIRAKOMEJE
Perezida wa Iran, Masoud Pezeshkian, yavuze ko igihugu cye kitazigera gihagarika porogaramu ya kirimbuzi, ndetse ko bazihorera niba bagabweho ibindi bitero.

Iran yashinje Israel ko ari yo yateje ibibazo byose, ndetse ishinja Amerika gukoresha uburyo bwose bushoboka mu guhungabanya ubusugire bwayo.