Air India: Abashinzwe ubugenzuzi babonye agasanduku k’umukara

Abashinzwe iperereza ku mpanuka z’indege mu Buhinde batangaje ko Cockpit Voice Recorder (CVR), kimwe mu bikoresho bizwi nka “black box”, cyabonetse ku munsi wa mbere kuri site y’impanuka ya Air India yabaye mu cyumweru gishize, kikaba ari icya kabiri mu byari birimo gushakishwa.

Iki gikoresho gikurikiranye n’icya mbere cyari cyabonetse ku cyumweru, ari cyo Flight Data Recorder (FDR), cyamaze koherezwa ahasanzwe hakorerwa isesengura kugira ngo hamenyekane icyateye impanuka yahitanye abantu barenga 270, barimo abari mu ndege n’abandi ku butaka.

Iri perereza rikorwa na Bureau y’iperereza ku mpanuka z’indege mu Buhinde (AAIB), ku bufatanye na NTSB yo muri Amerika (Nk’igihugu cyakorewemo indege za Boeing yakoze impanuka) , rikaba ririmo gushaka kumenya niba impanuka yatewe n’impamvu zirimo: Ibibazo mu mikorere ya moteri, Kutifunga neza kwa flaps, Ikibazo cya tekinike ku biziga by’indege n’ikosa ry’abantu cyangwa amakosa ya tekinike

Hari amakuru avuga ko abapilote bashobora kuba bahuye n’imbogamizi zidasanzwe mu gihe bari bagiye kugwa ku kibuga, ariko ibyo byose bikazemezwa bigatangwaho umucyo n’isesengura rizava mu majwi yafashwe na CVR.

Indege ya Air India, yo mu bwoko bwa Boeing 787, yari iturutse i Dubai igana Ahmedabad. Yaguye bitunguranye mu gace ka Meghani Nagar, igonga inyubako y’abaturage, maze ihitana ubuzima bw’abagera kuri 270.

Umwe mu bantu bake barokotse yavuze ko “moteri y’indege yatangiye gusohora umwotsi mbere gato yo kugwa”, icyateye impaka mu itangazamakuru n’abasesenguzi b’umutekano w’indege.

Nyuma y’iyi mpanuka, Minisiteri y’ubwikorezi mu Buhinde yasabye ko hakorwa isuzuma ryihariye ku zindi ndege zo mu bwoko bwa Boeing 787, by’umwihariko izifite moteri za GEnx, nk’iyo yari iri kuri iyo ndege.

Biteganyijwe ko raporo y’iperereza ya mbere izatangazwa mu byumweru bibiri biri imbere, ariko igisubizo cyuzuye kizamenyekana nyuma y’amezi make, nk’uko bisanzwe bigenda mu manza z’indege.

Kuboneka  kwa black box ya kabiri ni intambwe ikomeye mu gushaka ukuri ku byateye impanuka y’indege ya Air India, imwe mu mpanuka mbi cyane mu mateka y’indege muri 2025. Inzego z’ubugenzuzi zirizeza abaturage n’abakora mu bwikorezi bwo mu kirere ko hazafatwa ingamba zikomeye mu kwirinda ibihe nk’ibi.