Guhera ku wa 5 kugeza ku wa 10 Ugushyingo 2025, u Rwanda ruri mu bihugu byitabiriye China International Import Expo (CIIE), imurikagurisha mpuzamahanga riri kubera mu Ntara ya Shanghai mu Bushinwa. Ni ku nshuro ya munani u Rwanda rwitabira iri murikagurisha, kuva ryatangira mu mwaka wa 2018.
Urwego rw’Igihugu rw’Iterambere (RDB) rwatangaje ko u Rwanda ruri kumurika: Ikawa y’u Rwanda izwiho ubuziranenge,, icyayi cyoherezwa mu mahanga, ubuki karemano, urusenda (chili) rw’umwimerere, macadamia n’ibikoresho by’ubukorikori n’ibihangano by’abanyarwanda
Ibi bicuruzwa bigaragaza ubwiza n’ubwoko butandukanye bw’ibyo u Rwanda rwohereza ku isoko mpuzamahanga, by’umwihariko ku isoko ry’Abashinwa.
RDB ivuga ko kwitabira CIIE ari uburyo bwo: kwagura amasoko y’ibicuruzwa by’u Rwanda, kumenyekanisha Igihugu ku rwego mpuzamahanga, kureshya abashoramari n’abakerarugendo no gushyira u Rwanda ku ruhando rw’ubucuruzi n’iterambere
Biteganyijwe ko protocole yemerera u Rwanda kohereza avoka mu Bushinwa izasinywa vuba, bikaba bizongera ubwoko bw’ibicuruzwa by’u Rwanda ku isoko ry’Abashinwa.
U Rwanda rukomeje gushimangira umubano n’Ubushinwa mu by’ubucuruzi, ishoramari n’ikoranabuhanga. Uru rubuga rwa CIIE rufatwa nk’amahirwe yo kwinjira mu isoko rinini ry’Aziya, no gukomeza ubufatanye mu rwego rwa dipolomasi y’ubukungu.
