MU MAHANGA
Tanzania: Ishyaka Chadema ryashinje Leta gufunga Umunyamabanga waryo wungirije
Polisi ya Tanzania yashinjwe guta muri yombi Umunyamabanga wungirije w’Ishyaka ritavuga rumwe na Leta rya Chadema, Amani Golugwa.
Itabwa muri yombi rya Amani Golugwa ryatangajwe na Chadema. Akekwaho kugira uruhare mu myigaragambyo n’urugomo byakurikiye amatora yabaye mu cyumweru gishize.
Polisi ya Tanzania yari iherutse gutangaza ko Golugwa n’abandi bantu icyenda bashakishwa kubera uruhare mu mvururu zakurikiye amatora.
Mu bandi bashakishwa harimo Josephat Gwajima, umuvugabutumwa ukomeye, aho itorero rye ryakuwe ku rutonde rw’amatorero yemewe mu ntangiriro za 2025 nyuma yo kunenga Leta ku ihohoterwa ry’uburenganzira bwa muntu.
Polisi kandi yasohoye impapuro zo guta muri yombi bamwe mu bayobozi bakuru b’iri shyaka batari bafunzwe barimo Brenda Rupia, ushinzwe itangazamakuru muri Chadema, ndetse na John Mnyika, Umunyamabanga Mukuru w’iri shyaka.
Chadema ni ryo shyaka rikomeye ritavuga rumwe na Leta muri Tanzania. Umuyobozi waryo, Tundu Lissu, amaze amezi menshi afunzwe kandi nawe ashinjwa ubugambanyi.
Perezida Samia Suluhu Hassan, uri ku butegetsi yatsinze amatora ku majwi arenga 97%, yari ahanganye n’abakandida 16 baturuka mu mashyaka mato, nyuma y’uko Tundu Lissu wa Chadema na Luhaga Mpina wo mu ishyaka ACT-Wazalendo babujijwe kwiyamamaza.
Impunzi 527 zivuye muri Congo ni zo zimaze kwakirwa i Rusizi
Tagawa wamamaye muri filime zirimo ’Mortal Kombat’ yapfuye
