Loni yagaragaje ko ubutabazi muri Minembwe budashoboka

Ishami ry’Umuryango w’Abibumbye rishinzwe guhuza ibikorwa by’ubutabazi (OCHA) ryagaragaje ko ubutabazi mu gice cya Minembwe, Itombwe no mu misozi miremire budashoboka bitewe n’uko inzira zaho zafunzwe n’imitwe y’ingabo.

Raporo ya OCHA yasohotse ku wa 24 Ugushyingo 2025 igaragaza ko kuva muri Mutarama, imitwe yitwaje intwaro yagabye ibitero byinshi ku basivili batuye muri ibi bice, amavuriro agera kuri abiri arasahurwa.

Iti “Kuva muri Gicurasi 2025, iki gihe gisa n’icyafunzwe cyose. Imihanda minini irimo Fizi-Lusuku-Point Zéro-Mikenke-Minembwe yarafunzwe bitewe n’imitwe y’ingabo ihari. Hashyizweho ingamba zikumira abacuruzi n’imiryango y’ubutabazi. Ibi byatumye imiryango myinshi ihava.”

Advertisement

Yasobanuye ko muri Kamena 2025, imodoka zari zijyanye imiti muri Minembwe na Itombwe zimwe inzira mu gihe cy’amezi hafi abiri ubwo zari zigeze mu gace ka Mulima kari mu bilometero 45 mu majyaruguru ya santere ya Fizi.

Uyu muryango wasobanuye ko muri Kanama 2025, ingabo ziri kuri Point-Zéro zabwiye abashinzwe ibikorwa by’ubutabazi ko batemerewe kwinjira mu bice birimo Minembwe.

Uti “Gufunga imihanda no gukumira abatabazi biri kugira ingaruka zikomeye ku baturage b’abasivili. Imibare yo mu Ukwakira 2025 ya Komisiyo ishinzwe urujya n’uruza rw’abaturage muri Kivu y’Amajyepfo, ivuga ko abaturage hafi 172.001 bahunze n’abatahutse muri Minembwe bafungiwe inzira inyuramo iby’ibanze bakenera n’ubutabazi.”

Advertisement

OCHA yagaragaje ko urwego rw’ubuzima muri Minembwe rwashegeshwe bikomeye kuko rukomeje kugira ikibazo cyo kubura imiti n’ibikoresho by’ubuvuzi bitewe n’uko ingabo zafunzwe inzira zijya muri iki gice.

Iti “Mu bitaro bikuru bya Minembwe, iki kibazo giteye impungenge. Kuva muri Nyakanga kugeza muri Nzeri 2025, mu bantu bapfuye, abarenga 60% (25 muri 40) ni abana. Igipimo cy’abapfa bazize imirire mibi ikabije cyageze kuri 26%, aho abana 16 muri 55 bakirwa bapfa, nk’uko imibare itangwa n’abayobozi bo ku bitaro ibivuga.”

Uyu muryango watangaje ko gufunga inzira zijya muri Minembwe byatumye ibiciro by’ibikenerwa by’ibanze bitumbagira, kuko ikilo cy’umuceri cyaguraga amafaranga ya Congo 5000 muri Mutarama, cyageze ku mafaranga 30.000 mu Ukwakira, umufuka w’ifu y’ubugari waguraga 15.000 ugera ku bihumbi 50.000 by’amafaranga ya Congo.

Advertisement

OCHA yasabye ingabo zafunze inzira guhagarika ibitero zigaba ku basivili no kubatera ubwoba, zikabemerera kujya aho bashaka, zigaha inzira imodoka zitwara imiti n’ibikoresho by’ubuvuzi kandi zikemerera imiryango y’ubutabazi kugera ku bakeneye ubufasha bwihuse.

Umutwe wa MRDP-Twirwaneho urwanirira Abanyamulenge batuye muri Minembwe uvuga ko kuva mu Ukwakira 2025, ingabo z’u Burundi, iza RDC, Wazalendo na FDLR byashinze ibigo birenga 70 mu bice bikikije aha hantu mu rwego rwo kubicisha inzara.

Umuvugizi w’ingabo z’u Burundi, Brig Gen Gaspard Baratuza, mu byumweru bibiri bishize yemereye BBC ko abasirikare babo bafunze inzira zijya muri Minembwe kuko ngo abatuye muri iki gice bakorana n’abanzi barimo umutwe witwaje intwaro wa RED Tabara.

Advertisement

Ati “Uvuye Minembwe akorana n’umwanzi, ntaharenga birumvikana. Nibitandukanye n’abo banzi n’abo bagizi ba nabi, hanyuma barebe ko batidegembya uko bashaka…Mu gihe bakiri mu bya RED-Tabara n’abandi bakorana, bigaragara neza ko bagiye kubahahira, ntibikunda.”

MDRP-Twirwaneho yasubije ko ibyo Brig Gen Baratuza yavuze atari byo, kuko imitwe irwanya Leta y’u Burundi irimo RED Tabara na FNL idakorera muri Minembwe kuko Abanyamulenge barayirwanyije kubera ko ikorana na Mai Mai, ihungira mu mashyamba.

Advertisement