DRC: Kabila yakatiwe urwo gupfa

Mu gitondo cyo kuri uyu wa kabiri, tariki ya 30 Nzeri 2025, inkiko za Repubulika Iharanira Demokarasi ya Congo zatangaje ko Joseph Kabila, wahoze ari Perezida w’icyo gihugu, yakatiwe urwo gupfa adahari. Icyemezo cyafashwe nyuma y’urubanza rurebana n’ibyaha bikomeye birimo ruswa, kunyereza umutungo wa leta, no guhonyora uburenganzira bwa muntu mu gihe cy’imyaka 18 yamaze ku butegetsi.

Kabila, utari mu gihugu, ntiyigeze yitabira urubanza rwe. Abamwunganira mu mategeko bavuga ko urubanza rwari rwuzuyemo impamvu za politiki, bagashimangira ko ari igikorwa cyo kumuharabika no kumuca intege mu ruhando rwa politiki. Nyamara ubushinjacyaha bwo bwagaragaje ibimenyetso bifatika byerekana ko Kabila yagize uruhare mu kunyereza miliyari nyinshi z’amadolari y’abaturage, ndetse no gutuma habaho ibikorwa by’ihohotera ry’uburenganzira bwa muntu mu bice bitandukanye by’igihugu.

Icyemezo cy’urukiko cyateje impaka ndende mu gihugu no mu mahanga. Abaturage bamwe babifashe nk’intambwe ikomeye mu kurwanya ruswa no guharanira ubutabera, mu gihe abandi babibonamo inzika ya politiki. Ibihugu bitandukanye n’imiryango mpuzamahanga birimo kwiga ku ngaruka z’icyo cyemezo, cyane cyane niba gishobora gutuma Kabila afatwa cyangwa se niba hari icyemezo cyafatwa ku rwego mpuzamahanga.

Advertisement