Centrafrique: Ingabo z’u Rwanda zubakiye abaturage uruganda rukora imigati

Ingabo z’u Rwanda ziri mu Butumwa bwa Loni bwo kugarura Amahoro muri MINUSCA, zubakiye abaturage bo mu Ntara ya Haute-Kotto uruganda ruto rukora imigati.

Ibirori byo gushyikiriza abaturage uru ruganga byabereye muri Perefegitura ya Haute-Kotto ku wa 31 Ukuboza 2025.

Byitabiriwe na Guverineri Evariste Thierry aherekejwe n’abayobozi b’inzego z’ibanze hamwe n’abaturage bo muri aka gace.

Advertisement

Ubutumwa bwashyizwe kuri konti ya X y’Ingabo z’u Rwanda bugaragaza ko “Ingabo z’u Rwanda ziri mu butumwa bwa Loni bwo kugarura Amahoro muri Repubulika ya Centrafrique (MINUSCA), bo muri Battle Group VII bashyikirije abaturage bo mu gace ka Gobolo muri Bria, uruganda rutunganya imigati.”

Uru ruganda rukora imigati rwubatswe n’abasirikare b’u Rwanda bo muri Battle Group VII ku bufatanye n’agashami ka MINUSCA gashinzwe kwambura intwaro no gusubiza mu buzima busanzwe abarwanyi.

Amakuru agaragara ku rubuga rwa Loni yemeza ko u Rwanda rufite abasirikare n’abapolisi bari mu butumwa bw’amahoro 5.885 mu bihugu bitandukanye ku Isi.

Advertisement

U Rwanda rwatangiye kohereza abasirikare n’abapolisi mu butumwa bwa Loni bwo kugarura amahoro mu 2004. Hari nyuma y’imyaka 10 ingabo za MINUAR zari mu Rwanda kuva mu mpera za 1993 zinaniwe guhagarika Jenoside yakorerwaga Abatutsi.

Ingabo z’u Rwanda ziri mu butumwa bw’amahoro zizwiho gukora ibikorwa bitandukanye byiyongera ku kubungabunga amahoro, bizihuza n’abaturage birimo umuganda n’ibyo kubaka ibikorwaremezo by’ibanze ku baturahe bo mu bice bitandukanye.

Advertisement