MU MAHANGA
Bobi Wine avuga ko yakubiswe n’inzego z’umutekano muri Uganda
Mu butumwa bwinshi yashyize ku rubuga rwa X ku mugoroba wo ku wa Gatandatu, Bobi Wine yatangaje ko yakubiswe inkoni mu maso, ndetse abandi bamushyigikiye bakubiswe bikomeye kugeza aho bajyanywe kwa muganga. Ibi byabaye ubwo bari bagiye mu bikorwa byo kwiyamamaza mu mujyi wa Gulu, umujyi munini mu majyaruguru ya Uganda.
“Abagizi ba nabi bambaye imyambaro ya polisi n’iy’ingabo batugabyeho igitero bakoresheje amabuye n’inkoni, batangira gukubita abantu bacu,” Bobi Wine yanditse mu butumwa bumwe. “Umwe muri bo yankubise inkoni mu maso… abavandimwe benshi bari mu bitaro. Ibi byose ni uko Museveni atinya abaturage.”
Umuvugizi w’ingabo, Chris Magezi, yashinje Bobi Wine n’abamushyigikiye gukora imyigaragambyo itemewe no kwiyamamaza mu masaha atemewe n’amategeko. Yagize ati: “Inzego z’umutekano ziriho kugira ngo buri wese yubahirize amategeko.”
Polisi ntiyasubije ubwo Reuters yageragezaga guhamagara kugira ngo itange igitekerezo cyayo.
Bobi Wine yavuze ko umwe mu bamufasha yakubiswe umutwe, ndetse yashyize ku mbuga nkoranyambaga ifoto ye agaragara amaraso ari kumuvubuka. Yongeyeho ko ibikoresho byifashishwa mu bukangurambaga, harimo n’amatangazo n’urusimbi rw’ijwi (public address system), byangijwe.
Video yashyizwe kuri konti ye yerekanye itsinda rinini ry’abasirikare n’abapolisi bakubita abantu inkoni.
Impungenge z’Umuryango w’Abibumbye
Ku wa Gatatu, Umuyobozi Mukuru w’Ishami ry’Umuryango w’Abibumbye ryita ku burenganzira bwa muntu, Volker Türk, yasohoye itangazo yamaganye ibyo yise “iyongera ry’igitugu ku batavuga rumwe n’ubutegetsi muri Uganda.” Yavuze ko nibura abantu 550 bashyigikiye ishyaka rya Bobi Wine, National Unity Platform (NUP), bafunzwe muri uyu mwaka.
Bobi Wine avuga ko yakubiswe n’inzego z’umutekano muri Uganda
Tanzania: Abana b’impunzi benshi baburiwe irengero mu nkambi za Nduta na Nyarugusu
